Aproveitarase para pintar os pasos de peóns da rúa José Pernas Peña e mellorar a visibilidade e a seguridade viaria nos desvíos pola Caeira.
A avenida da Barca, na PO-308 en Poio, recuperará de maneira provisional o dobre sentido de circulación con motivo da Semana Santa. Así, desde a tarde deste venres e ata o luns 6 de abril (incluído), os vehículos poderán circular en ambos sentidos, coincidindo coa parada da actividade no sector da construción durante estas datas.
Esta medida ten como obxectivo facilitar a mobilidade e mellorar a fluidez do tráfico nun período de especial afluencia de vehículos. Desde o Concello de Poio recordan que o compromiso do Goberno é reducir ao máximo os períodos de sentido único de circulación aos momentos que sexan imprescindibles para avanzar coas obras.
Ademais, o luns día 6 aproveitarase que aínda non estará activado o desvío pola Caeira para levar a cabo tarefas de mellora na sinalización viaria. En concreto, procederase ao pintado dos pasos de peóns na rúa José Pernas Peña para mellorar a visibilidade e seguridade.
Esta actuación corresponde á primeira fase do proxecto de humanización da PO-308, que ten como finalidade recuperar o espazo público para as persoas, priorizando o tránsito peonil fronte ao motorizado, así como favorecer o comercio local, a accesibilidade e a seguridade viaria. Entre as actuacións que se están executando inclúense a ampliación das beirarrúas (cun mínimo de 2,5 metros), a instalación de elementos de calmado do tráfico, a mellora dos servizos urbanos, novo mobiliario público, zonas asistenciais, infraestruturas para o transporte público e prazas de aparcamento para persoas con mobilidade reducida.
