Remata a reforma integral do parque infantil de Chancelas, en Combarro

01/11/2024

Renováronse os elementos de xogo, instalouse solo de caucho e substituíuse todo o valado. Ángel Moldes sinala que o obxectivo é dotar dun espazo de xogos seguro, que está homologado, para a cativada no lugar da Bouza, en Chancelas.

O Concello de Poio concluíu a reforma integral do parque infantil de Chancelas, en Combarro, un espazo que está homologado e, polo tanto, ofrece todas as garantías de seguridade para a rapazada.

O alcalde, Ángel Moldes, destaca que “queremos que os nosos nenos e nenas teñan espazos de xogo preto dos seus fogares, pero sobre todo, que estes lugares nos que divertirse e socializar sexan completamente seguros”, e recorda que “no caso de Chancelas, estamos dando resposta a unha demanda dos veciños deste lugar desde hai moitos ano”.

A remodelación integral deste parque incluíu a renovación dos elementos de xogo, que abarcan diferentes idades de uso, en función da habilidade e destreza dos usuarios. Así, inclúese un pórtico con columpios, un equipo combinado de tobogán con plataforma e xogo de muelle. Ademais, colocouse tamén un banco de madeira, instalouse pavimento de caucho continuo e substituíuse todo o valado do perímetro.

Unha actuación que contou cunha achega da Xunta de Galicia, que financiou o 70% do custe do proxecto e, segundo explica Moldes, “permitiu mudar as condicións de deterioro dun espazo que incumpría a normativa de parques infantís, non só polo deterioro e mal estado das pezas de xogo, que provocaban que estivese inutilizado nos últimos anos, senón tamén polas distancias e porque mesturaba estes elementos con biosaudables dentro do mesmo recinto”.

OUTRAS NOTICIAS

Scroll al inicio