O Concello de Poio está realizando labores de mantemento no paseo do Porto de Combarro, para substituír máis de 300 baldosas de pedra e pizarra rotas, soltas ou levantadas, e garantir así a seguridade dos peóns ao mesmo tempo que se mellora a imaxe dun dos lugares máis visitados do municipio. Posteriormente, as tarefas tamén incluirán a limpeza do pasamán de pedra.
Con anterioridade, xa se actuou tamén na Praza da Chousa e no seu perímetro, repoñendo todas as pedras que estaban deterioradas.
Coa chegada do bo tempo, desde o Concello de Poio están intensificando as labores de mantemento e reposición en todo o municipio. Así, ademais de estar realizando as tarefas de desbroce e limpeza de cunetas, recentemente renovaron a madeira da ponte peonil da Reiboa, melloraron a accesibilidade no paso inferior da ponte da Barca e tamén repararon a pasarela de madeira da praia da Cabeceira, en Lourido. “Pequenas actuacións que son fundamentais para mellorar a seguridade e a calidade das nosas infraestruturas”, sinala o edil de Obras e Servizos, Marcial García.
