Dous viais de Raxó levarán, por iniciativa popular, o nome de veciños “moi queridos” da parroquia. Unhas solicitudes impulsadas por veciños que veñen acompañadas de máis de 300 sinaturas e que propoñen que a actual “segunda Travesía da praia”, que une a rúa Dr. Clemente Echevarría Novoa e a Rúa da Praia, pase a denominarse “rúa de Lalo e Aurita”; e o vial que une a rúa Lameiriña coa Avenida da Toxa (PO-308), á altura do nº 35, actualmente sen nome, que adopte a denominación “Travesía Gonzalo Rodríguez Sanín”, segundo explica a edil de Urbanismo, Rocío Cochón.
Estas propostas aprobaranse no pleno ordinario de marzo, que se celebra esta tarde. Cochón subliña que a iniciativa e o respaldo popular para estas solicitudes demostra “a gran pegada que deixaron estes veciños na vila” pero tamén “que Raxó non esquece aos homes e mulleres que o fixeron como é hoxe”, como é o caso das persoas homenaxeadas.
Eduardo Agís Fernández (Lalo) e Aurea Besada Sanmartín (Aurita) foron un matrimonio de Raxó que, partindo de orixes humildes e de necesidade, conseguiron mellorar economicamente e axudar a boa parte da veciñanza de Raxó. Cunha longa traxectoria no mar, que levou a Lalo a ser o patrón de baixura máis novo de España e a capitanear varias embarcacións, durante moitos anos rexentaron o afamado “Casa Verísimo”, lugar de referencia gastronómica e social da comarca grazas á mestría na cociña tradicional de Aurita.
Gonzalo Rodríguez Sanín era natural de Samieira e tamén foi mariñeiro de mozo. En 1991, e xa casado con Carmen, fundou, ao pé da estrada PO-308, o Mesón Lameiriña, adicado a ofrecer aos seus clientes o mellor produto da ría. Ao longo de 33 anos, conseguiron converter este establecemento nunha referencia gastronómica para toda a comarca, acompañados dos seus tres fillos, Gonzalo, Cristina e Carmen María.
Case un ano despois do seu pasamento, os alicerces que asentou fan que o Mesón Lameiriña siga a ser unha referencia gastronómica na contorna nas mans da súa familia, e tamén que a súa figura siga a ser recordada como un “hostaleiro queridísimo, persoa afable e veciños exemplar”. A poucos metros do emprazamento do Mesón que fundou, a nova “Travesía Gonzalo Rodríguez Sanín” será unha homenaxe a unha traxectoria empresarial e persoal.
Unha vez aprobado polo pleno, o cambio comunicarase a institucións, organismos e empresas de servizos públicos así como ao INE. Posteriormente instalaranse as placas coas novas denominacións e facilitaranse todos os trámites aos residentes a custo cero.
Ademais, despois da tramitación destas dúas peticións rexistradas en 2023, o Goberno local proporá regular os criterios e procedementos para a denominación de vías por iniciativa popular.
