O documento establecerá mecanismos de prevención, detección e actuación ante posibles situacións de discriminación, acoso ou violencia por razón de orientación sexual ou identidade de xénero. O Goberno local prevé que o protocolo estea redactado e aprobado antes de que remate o ano.
O Concello de Poio iniciou os traballos para elaborar o seu primeiro protocolo de prevención e actuación fronte ao acoso, a discriminación e a violencia contra as persoas LGTBI. Trátase do primeiro documento específico co que contará a administración local para establecer medidas de protección deste colectivo e definir como actuar ante posibles situacións de discriminación por razón de orientación sexual, identidade ou expresión de xénero.
Con esta iniciativa, o Goberno local quere cubrir unha carencia existente ata o momento, dotando ao Concello dun instrumento propio que permita previr, detectar e abordar este tipo de situacións. O documento establecerá pautas de actuación para que os servizos municipais dispoñan de criterios claros á hora de intervir e prestar atención ás persoas afectadas.
O protocolo recollerá os procedementos que deberán seguirse cando se detecte unha situación de acoso ou violencia contra as persoas LGTBI, así como as medidas de protección e atención que correspondan en cada caso. Entre os aspectos que se abordarán figuran a confidencialidade, o respecto á intimidade e a coordinación dos servizos municipais implicados.
A elaboración deste documento supón un avance para o Concello de Poio en materia de igualdade. Un dos principais obxectivos será establecer criterios comúns que faciliten a resposta municipal ante posibles casos de acoso ou discriminación, evitando actuacións improvisadas e procurando que as persoas afectadas reciban unha atención adecuada.
APROBACIÓN ANTES DE FINAIS DE ANO
O Concello inicia agora o proceso de redacción do documento, no que se definirán o seu ámbito de aplicación, os procedementos de actuación e as medidas de prevención e protección que incorporará.
A previsión do Goberno local é rematar a redacción do documento e proceder á aprobación antes de que finalice o ano 2026.
