O Concello de Poio aprobou unha axuda de 2.943 euros para a ANPA A Gamela do CEIP de Lourido, que permite reducir a tarifa que tiveron que pagar as familias por este servizo nos primeiros tres meses do ano, entre xaneiro e marzo.
Este convenio está asinado cos colexios que dispoñen de comedor escolar en Poio, ao que este curso se incorporou o CEIP Isidora Riestra que inaugurou comedor o pasado mes de setembro. O Concello de Poio outorga unha axuda de 1,5 euros por neno e por día.
Aínda que o convenio é para todo o curso escolar, o pago das subvencións realízanse segundo cada asociación vaia presentando a súa xustificación, de xeito que pode ser trimestral, semestral ou ao final do curso, segundo sexa vontade de cada anpa.