Este xoves, ás 19.00 horas, será a inauguración, que contará coa asistencia do alcalde, Ángel Moldes.
O Concello de Poio continúa a reforzar a súa aposta pola cultura local dentro da programación de San Xoán cunha nova proposta artística protagonizada pola creadora poiense Sara Ramos. A artista inaugurará este xoves, 4 de xuño, ás 19.00 horas no Casal de Ferreirós, a exposición Mitoxénese, unha mostra de ilustración que poderá visitarse durante todo o mes, coincidindo coa celebración das festas de San Xoán.
Sara Ramos, artista residente en Poio, ten 22 anos e é graduada en Belas Artes. O seu traballo céntrase principalmente nas artes gráficas, especialmente na ilustración e no concept art, cunha marcada vocación multidisciplinar. Nas súas creacións combina obra gráfica con enxeñaría de papel, collage, escultura e medios dixitais, dando forma a un universo creativo propio e en constante evolución.
A través de Mitoxénese, Ramos presenta unha colección de pezas nas que a fantasía, o realismo máxico e a narración visual conviven arredor de temáticas como a mitoloxía e a literatura. Trátase dun percorrido polo seu traballo desde 2023 ata hoxe.
Ademais do interese polas referencias mitolóxicas e literarias, a artista aposta tamén pola creación dun imaxinario propio, desenvolvendo personaxes, mundos e relatos que enriquecen cada unha das súas pezas e converten a ilustración nun espazo de encontro entre arte e narración.
A exposición de Sara Ramos forma parte da programación cultural impulsada polo Goberno local arredor do San Xoán, dentro da aposta por facer protagonistas á veciñanza de Poio, poñendo en valor o talento local e achegando á veciñanza diferentes propostas culturais ao longo destas semanas festivas.
O horario de visita da exposición no Casal de Ferreirós será de luns a venres de 09.00 a 14.00 horas e de 17.00 a 19.00 horas. Os sábados a sala de exposicións estará aberta entre as 10.30 e as 13.00 horas.semanas festivas.
