Nos últimos días o Concello de Poio procedeu a levar a cabo o acondicionamento da alameda de San Xoán, nas inmediacións do Mosteiro e da Casa Consistorial. O concelleiro de Obras e Servizos Municipais, o socialista Julio Casás, pasou revista este luns ao estado da explanada, que loce un novo aspecto logo das tarefas desenvoltas desde a pasada semana ata este luns. Para poder facilitar o labor dos operarios municipais foi preciso cortar o aceso ao tráfico rodado e prohibir o estacionamento, que “xa está de novo operativo”, adiantou Casás Barral.

A concelleira de Seguridade Cidadá, a nacionalista Marga Caldas, vén de confirmar que o Concello de Poio solicitará unha achega a través da Rede Ágora, impulsada pola Deputación de Pontevedra e á que está adherida a Administración local desde o ano 2020, para proceder á redacción dun ambicioso proxecto para transformar e mellorar a Baixada á Chousa, en Combarro. Tal e como lembra Caldas Moreira, este programa provincial está destinado a municipios que contan con menos de 50.000 habitantes, marcando coma obxectivo impulsar traballos que promovan espazos seguros, cun maior protagonismo ás sendas e itinerarios para peóns e ciclistas.

Logo da publicación no Boletín da Provincia das bases do Plan Músico Cultural do Concello de Poio, impulsado pola Concellería de Cultura, xa está aberto o prazo para a petición de solicitudes, así como para a adhesión de grupos folclóricos e de música popular ao catálogo virtual. Esta iniciativa nace co obxectivo de facilitar e garantir o mantemento da actividade musical dos grupos locais nas programacións das festas do concello, ademais de axudar a dar visibilidade ao seu traballo, ao mesmo tempo que impulsa un catálogo virtual que se actualizará de xeito regular, modernizando, deste xeito, o proceso de inscricións.

O concelleiro de Obras e Servizos Municipais, o socialista Julio Casás, informa de que o Concello pon a disposición da veciñanza un aparcadoiro disuasorio nas inmediacións de Anafáns. Este espazo emprázase nunha parcela situada moi próximo da intersección da PO-308 coa vía de acceso ao Centro de Saúde. Tal e como explica o delegado deste departamento, este terreo poderá ser utilizado mentres duren as obras de rehabilitación que se están a acometer na contorna da Rúa do Adro e da Porteliña, iniciadas hai xa uns días. “Este é o segundo aparcadoiro que xestionamos para ofrecer ás persoas residentes un lugar no que estacionar mentres se desenvolvan os traballos”, indica Casás Barral, que agradece a colaboración dos propietarios destes terreos.