fbpx

A tenente de alcalde, Silvia Díaz (Avante Poio), mantivo este pasado mércores unha reunión con representantes das asociacións veciñais do municipio. En concreto, estiveron presentes dirixentes da A V O Bao, AVCR Combarro, AV Boureante, AV San Xosé, AV A Laxe e ACV Ronsel. O encontro tivo lugar no salón de Plenos do Consistorio e serviu para dar traslado do borrador do novo Regulamento de Participación Veciñal. A concelleira delegada desta área explicou aos directivos e directivas que tomaron parte na cita que o proxecto de regulamento será tratado no Pleno neste mes de maio para ser sometido a aprobación inicial. A partir de aí, abrirase un período de exposición pública para a presentación de alegacións, antes da súa aprobación definitiva.

O alcalde de Poio, Luciano Sobral, e a concelleira de Seguridade Cidadá, Marga Caldas (BNG), presentaron este xoves os detalles do plan que o Concello de Poio acometerá en Combarro para dotar á contorna do núcleo da parroquia de máis de medio cento de prazas de estacionamento para residentes, que se habilitarán en parcelas particulares e que a Administración local poderá xestionar grazas aos pertinentes acordos de cesión acadados cos seus propietarios e propietarias. A maiores, tamén se traballará na posta a punto dun espazo para aparcamento aberto para toda a veciñanza. “Estamos a falar, en cifras mínimas, dunhas 160 prazas de nova creación”, sinala Caldas.

 

A tenente de alcalde e responsable da área de Igualdade, Silvia Díaz (Avante Poio), informa da apertura do prazo para a presentación de solicitudes para optar ás achegas que, por segundo ano consecutivo, impulsa este departamento municipal e que están dirixidas a asociacións de mulleres do municipio. A través desta liña de axudas búscase fomentar a igualdade de oportunidades e o empoderamento feminino. As axudas, de ata un máximo de 1.000 euros por colectivo, servirán para cubrir iniciativas desenvoltas entre o 1 de decembro de 2021 e o 30 de novembro de 2022.

Varios centros educativos do municipio acolleron ao longo  da pasada semana as charlas ‘Desmontando os prexuízos sobre a lingua galega’, unha actividade que se inclúe dentro da campaña ‘O que se dá non se quita’, impulsada pola Concellería de Normalización Lingüística, en colaboración coa área de Educación, co obxectivo de promover e potenciar o uso da lingua galega entre a sociedade, poñendo o foco especialmente nas crianzas e na mocidade. Tal e como recorda a concelleira  nacionalista Marga Caldas, estes coloquios forman parte da axenda cultural Verbas en Flor, no que tamén se implica este departamento, en colaboración con Cultura, Educación e Medio Ambiente.

A concelleira de Deportes, Marga Caldas (BNG), presentou hoxe, acompañada por integrantes da directiva da Asociación de Veciños de Campelo, os detalles da XXXIII Maratón de Fátima, que se disputará este sábado, 14 de maio, a partir das 18.00 horas coas probas para a rapazada (a carreira da categoría absoluta iniciarase ás 18.45 horas). Será esta unha edición moi especial, xa que, tal e como lembrou a propia edil do Goberno local, “Campelo recupera unha proba deportiva emblemática, que nos últimos anos non se puido desenvolver por mor da pandemia da COVID-19, e, ademais, formará parte, como xa era habitual en tempos pasados, da programación das Festas da Fátima, que organiza a Comisión de Festas de Campelo nesta fin de semana”, recalcou Caldas Moreira, que puxo en valor o esforzo e dedicación dos colectivos para “poder ofrecer á veciñanza unha programación lúdica do máis variada para estas xornadas”.