A comisión de seguimento do Plan Especial de Combarro e do Catálogo deu luz verde esta mañá, por unanimidade, ao proxecto de rehabilitación da casa San Roque, 59, en Combarro, que vai acometer a Deputación de Pontevedra. Unhas obras de mellora que ascenden a 136.414 euros e que permitirán deixar o inmoble en perfectas condicións de habitabilidade antes de que o Concello de Poio reciba a súa cesión.
A Aula da Rede de Centros para a Modernización e Inclusión Tecnolóxica da Xunta de Galicia, Rede CeMIT, programou para o mes de outubro oito cursos novos de habilidades dixitais coas que amplía a súa oferta formativa, todas elas gratuítas, entre as que destacan procesadores de texto e de cálculo, impresión 3D, robótica, posicionamento web, iniciación ao community manager ou compras seguras na rede.
Xa está aberto o prazo para anotarse nas escolas deportivas do Concello de Poio, que darán comezo a partir do mes de outubro. O edil delegado, Cándido Muíños, explica que hai quince disciplinas diferentes, desde fútbol e fútbol sala, ata balonmán, baloncesto, triatlón-duatlón, ximnasia rítmica, tenis, ciclismo, taekwondo, piragüismo, caiac polo, atletismo, kick-boxing, rugby e vela.
O alcalde de Poio, Ángel Moldes, xunto co representante da empresa adxudicataria e os concelleiros de Urbanismo e de Obras, Rocío Cochón e Marcial García, respectivamente, reuníronse onte pola noite cos veciños de Liñares, na parroquia de San Xoán, para explicarlle as obras de humanización que comezarán a executarse a semana próxima con cargo ao Plan Concellos da Deputación de Pontevedra. Unha reunión na que Moldes quixo coñecer a opinión e as propostas dos veciños, xa que, como subliñou “son os que van convivir diariamente coa humanización da rúa, e por iso queremos darlle a resposta que necesitan”.
O novo Goberno local fai balance nos primeiros cen días de mandato: “Poio ten hoxe un goberno único, cohesionado e que está centrado exclusivamente no importante, que é atender e responder ás necesidades e prioridades de todos os nosos veciños”, sinala o alcalde Ángel Moldes. Un goberno que, indica, “a pesar da difícil herdanza económica que recibiu, en tres meses desbloqueou e puxo en marcha medidas e iniciativas importantes e necesarias, pero tamén está convertendo ao concello nunha administración máis próxima, áxil e dialogante”.
Poio está en continua transformación e crecemento. O noso municipio medra e o Concello de Poio, que sempre apostou e segue apostando pola posta en valor da nosa historia e das nosas tradicións, modernízase para adaptarse ós novos tempos e optimizar os nosos recursos. Poio é xa un lugar de referencia consolidado na xeografía mundial, e agora, grazas ás novas tecnoloxías, temos tamén o noso sitio neste espazo virtual, universal e participativo que é a Rede. Estamos agora máis cerca de todos, dos que vivimos aquí e dos que se atopan lonxe.