A tenente de alcalde e responsable de Espazos Cidadáns, Silvia Díaz (Avante Poio), visitou este mércores as remodeladas dependencias do local social de Tarrío, no que o departamento municipal vén de promover unha importante reforma. Díaz desprazouse ata o inmoble, situado na parroquia de Samieira, para dar a benvida ao alumnado do Programa Saudemente, que retoman a súa actividade nestas dependencias unha vez concluídas as tarefas, e estivo acompañada pola edil de Benestar Social, Rosa Fernández (PSdeG-PSOE), e o concelleiro de Obras, o tamén socialista Julio Casás.
As formacións impulsadas a través da segunda edición do programa Descubre Poio, promovido pola Concellería de Turismo, xa están en marcha. A pasada semana o Casal de Ferreirós, na parroquia de San Salvador, acolleu unha sesión formativa para profesionais do sector, que se centrou no uso das redes sociais. A cita, na que tomou parte a tenente de alcalde e concelleira delegada da área, Silvia Díaz (Avante Poio), estivo ao cargo de Alberto Ribas, ‘Alvientooo’, un ‘blogger’ especialista en viaxes e creador de contidos veciño de Poio.
O concello de Poio contará por primeira vez neste 2023 con dous Sendeiros Azuis. Así o confirma o alcalde, Luciano Sobral, que informa de que ao distintivo acadado en 2022 para o paseo litoral entre A Seca e Lourido súmase nesta ocasión o tramo da Variante Espiritual do Camiño Portugués, cuxa primeira etapa pasa polo municipio poiense, ata chegar ao Mosteiro da Armenteira (Meis). Este selo de calidade é outorgado cada ano pola Asociaicón de Educación Ambiental y del Consumidor (Adeac), a través do cal recoñécense os recursos naturais, ambientais e de lecer que presentan este tipo de espazos ao aire libre. O rexedor participará o vindeiro 24 de febreiro no acto de entrega das bandeiras, que terá lugar en Santiago de Compostela.
Unha lectura de poemas e dun manifesto, sesións de contacontos para as crianzas e a campaña #FalaBonito son algunhas das iniciativas que este ano o Concello de Poio impulsa para conmemorar o Día de Rosalía de Castro, o vindeiro xoves 23 de febreiro. Unha programación que nesta edición leva como eslogan ‘Rosalía saca a lingua’. A concelleira de Dinamización Lingüística, Raquel Rodríguez (BNG), acompañada pola tamén nacionalista Marga Caldas e a responsable da Biblioteca Municipal, Macarena Ferreiro, deu a coñecer as iniciativas a desenvolver ao longo desta semana, que se suma á campaña #FalaBonito, xa posta en marcha nos centros educativos de Poio co obxectivo de incidir na promoción e fomento da utilización da lingua galega entre o alumnado.
O Entroido xa está en marcha en Poio. O pistoletazo de saída tivo lugar este domingo, coa recuperación do tradiciónal Desfile, que dá inicio a unha programación que se prolongará ata ben entrado o mes de marzo. Centos de persoas congregáronse entre a Praza da Granxa de Campelo e A Seca para gozar cos espectáculos, os disfraces, os deseños e o colorido da espectacular comitiva, que contou cunha alta participación. O Concello de Poio repartiu máis de 6.500 euros en premios entre os mellores disfraces, elixidos polo xurado formado polos membros da Comisión de Cultura.
PROMOCION ECONOMICA
Poio está en continua transformación e crecemento. O noso municipio medra e o Concello de Poio, que sempre apostou e segue apostando pola posta en valor da nosa historia e das nosas tradicións, modernízase para adaptarse ós novos tempos e optimizar os nosos recursos. Poio é xa un lugar de referencia consolidado na xeografía mundial, e agora, grazas ás novas tecnoloxías, temos tamén o noso sitio neste espazo virtual, universal e participativo que é a Rede. Estamos agora máis cerca de todos, dos que vivimos aquí e dos que se atopan lonxe.