Ángel Moldes pon en valor o traballo do tecido asociativo do municipio para manter viva unha tradición tan importante.
Poio celebrará ata finais de novembro doce magostos que chegarán a todas as parroquias e lugares do municipio. Esta mañá o alcalde Ángel Moldes e a concelleira de Cultura e Educación, Natalia Sabarís, mantiveron un encontro con algúns dos colectivos que impulsan estas citas para reiterarlle o apoio do Concello de Poio coa súa organización e puxeron en valor todo o traballo posto en marcha polo tecido asociativo do municipio para manter viva unha tradición tan arraigada. En total, o Concello de Poio estima que se repartirán preto de 900 quilogramos de castañas asadas.
A concellería de Cultura e Educación, Natalia Sabarís, e a xefa territorial de Infraestruturas e Mobilidade, María Martínez, visitaron esta mañá o colexio de Chancelas, en Combarro, acompañados pola directora do CEIP e do responsable provincial da AXI, Manuel Juanatey, para comprobar sobre o terreo as diferentes alternativas que hai para evitar que o alumnado de infantil teña que coller o autobús de regreso ás súas casas na PO-308. Segundo explica a concelleira, esta é unha das prioridades do novo Goberno para garantir a máxima seguridade do alumnado de 3 a 5 anos do colexio, que teñen que desprazarse cen metros e baixar por unhas escaleiras para subir ao autobús na estrada xeral porque as dimensións do vehículo e o acceso da vía impiden que chegue ata o colexio. “Unha situación de risco, porque estamos falando de nenos moi pequenos para os que un despiste menor neste caso podería ser fatal”, advirte Sabarís.
A Asociación de Mulleres Arela impulsa o Concurso de Microrrelatos ‘Os Misterios de Kam’, unha iniciativa coa que colabora o Concello de Poio e que ten como obxectivo a difusión cultura e a promoción da Festa do Samaín. Segundo explica a concelleira de Cultura e Educación, Natalia Sabarís, este concurso está dirixido a público de 11 anos en diante, que participarán en tres categorías diferentes: de 11 a 16 anos, de 17 a 25 anos, e maiores de 25. A gañadora ou gañador en cada unha das categorías levarase un premio de 100 euros máis un agasallo conmemorativo.
O alcalde de Poio, Ángel Moldes, participou a finais desta semana na Comisión Mixta para o seguimento da cesión demanial da Illa de Tambo, xunto co comandante director Pedro Cardona e outros responsables da Escola Naval Militar de Marín e técnicos municipais. Neste primeiro encontro no que participa o rexedor, Moldes avanzou o novo plan de usos e conservación da Illa, un documento fundamental para desenvolver proxectos que poñan en valor o lugar. Como explicou, o obxectivo principal é garantir a conservación e protección dos recursos naturais, culturais e inmateriais deste espazo natural, e promover tamén novos usos de acordo co carácter público do lugar.
A concelleira de Benestar e Igualdade, Natividad Torres, presidiu onte pola tarde a reunión do Consello Municipal da Muller, na que participaron representantes dos grupos municipais así como de asociacións e colectivos locais. Torres aproveitou o encontro para avanzar algunhas das propostas da campaña que vai desenvolver o Concello de Poio para concienciar sobre a violencia contra as mulleres, coincidindo coa conmemoración do 25N, e que terán como destinatarios principais a nenos e nenas, adolescentes e mocidade, para que interioricen a igualdade como un valor esencial. “Durante finais de outubro e o mes de novembro a programación será máis intensa, pero o obxectivo é traballar e facer propostas durante todo o ano para interiorizar a igualdade como un valor esencial”, explicou.
Poio está en continua transformación e crecemento. O noso municipio medra e o Concello de Poio, que sempre apostou e segue apostando pola posta en valor da nosa historia e das nosas tradicións, modernízase para adaptarse ós novos tempos e optimizar os nosos recursos. Poio é xa un lugar de referencia consolidado na xeografía mundial, e agora, grazas ás novas tecnoloxías, temos tamén o noso sitio neste espazo virtual, universal e participativo que é a Rede. Estamos agora máis cerca de todos, dos que vivimos aquí e dos que se atopan lonxe.