fbpx

O Goberno municipal de Poio convoca aos profesionais do sector turístico e hostaleiro, un dos máis castigados polos peches e ceses de actividades derivados das restricións aplicadas pola Xunta de Galicia contra a pandemia da COVID-19 para participar nunha reunión telemática, que terá lugar o vindeiro mércores 12 de maio, para abordar o borrador das bases polas que se rexerán o reparto de axudas directas que levará a cabo o Concello.

Cómpre lembrar que a Administración municipal ten previsto inxectar ata 150.000 euros para estes negocios afectados, dos cales 100.000 proveñen de fondos propios (concretamente, do Remanente de Tesourería), aos que hai que engadir outros 50.000 achegados pola Deputación Provincial de Pontevedra.

Precisamente, os dirixentes municipais trataron esta cuestión nunha reunión de traballo celebrada esta semana. Tal e como sinala o Goberno local, o documento no que se inclúen as bases de reparto destas axudas está sendo revisado polo departamento de Intervención. Posteriormente, este borrador inicial será amosado aos profesionais, para que coñezan os trámites e requisitos a cumprir para poder optar a esta liña de axudas, anunciada en marzo e que xa pode tramitarse, logo da pertinente aprobación plenaria para facer uso do Remanente de Tesourería correspondente á liquidación do Orzamento de 2020. Os e as profesionais interesadas en participar na reunión telemática deberán enviar un correo electrónico á dirección Este enderezo de correo está a ser protexido dos robots de correo lixo. Precisa activar o JavaScript para velo. desde a cal se lles remitirá unha ligazón para poder conectarse ao encontro virtual. Antes de aprobar definitivamente as bases, o Concello quere ter en conta as achegas e opinión do sector.

O reparto destas axudas forma parte dun plan de reactivación económica, o Plan Activa 21, en resposta á crise provocada pola COVID-19, no que o equipo de Goberno leva traballando desde hai meses, e que persegue varios obxectivos, entre o que se inclúe volcarse cos sectores cuxa actividade se viu moi minguada coa chegada da pandemia e entre os que se atopan a propia hostalería, o turismo ou o eido da cultura. A implicación do Concello céntrase non só na dotación destas axudas directas, senón tamén en impulsar iniciativas que incentiven a economía local, a promoción turística e a formación, así como continuar potenciando o labor que desenvolven departamentos como Servizos Sociais. Para iso, contémplanse numerosas actuacións e iniciativas que se farán realidade grazas a partidas que figuran nos Orzamentos municipais deste ano, así como a través do Remanente de Tesourería ou da obtención dun préstamo por valor de 2,7 millóns de euros, cun interese do 0%.